|
6588元支靚紅酒任你試
Kelly每年都期待一年一度美酒佳餚巡禮,因為又有機會試各款美酒嘛。今年活動臨時移師前啟德機場跑道,地點唔算就腳,但就改為免費入場。參展商仲帶咗唔少靚酒畀入場人士試飲,包括全場最貴、每支價值六千五百八十八蚊嘅澳洲PenfoldsGrange○九年紅酒,以美國橡木桶釀製南澳出產嘅Shiraz,入口帶有獨特嘅煙熏味同香草味,果味濃鬱,講到Kelly都心鬱鬱想去試嚇。
今年會場分咗五大主題,合共二百七十個攤位。有朋友提醒Kelly買定品酒證入場飲靚酒,品酒證有兩款,二百蚊可以買到Classictokens八張,四百八十蚊就可以買到Grandtokens五張。頭先講到全場最貴嘅PenfoldsGrange,可以喺尊尚名酒區搵到,只要三張Grandtokens就可以試飲,即花二百幾蚊即可。
姊妹們假如酒量唔好,Kelly推介去派對美酒區試嚇台灣櫻花蜜桃酒,酒樽佈滿粉紅色櫻花,非常fancy,Kelly試飲過,入口清香、酸酸甜甜咁,啱曬女仔。
提提大家,旅發局分別喺藍田、九龍塘同尖東港鐵站安排免費穿梭巴士來往會場㗎,唔怕唔識路啦!
■每支價值六千五百八十八蚊嘅澳洲Penfolds Grange○九年紅酒。
■美酒佳餚巡禮移師前啟德機場跑道舉行。
資料來源:頭條日報(30 October 2014)
|
|