本帖最後由 thermostat 於 2016-2-6 21:27 編輯
眼濕濕滴汗【唱live堅掂】 25歲坤哥等足5年:終於做到正式歌手
五年話短唔短話長唔長,但對廿歲已入大台,做足四年音樂節目主持的吳業坤「坤哥」來說,睇住當年戰友一個個出碟,睇住唔少唱得比自己差的都上佢節目做嘉賓獻唱,自己就愈做愈霉要做埋台慶隻人肉棋,心情可想而知。好在忍辱負重多年,今日終於有人賞識,廿五歲生日在銅鑼灣開加盟星娛樂記招,佢一出場就好緊張,坤哥式靦腆加口窒窒,抖啖大氣後就話:「終於做到正式歌手‧......未來日子希望仲可以同大家講多謝。」當中的含意和戰戰兢兢大家都感受到。之後唔同嘉賓上台賀佢時,佢仲眼濕濕。
今日簽約儀式場面都幾溫馨,五年來一直撐佢的「哥」迷自然全程喪嗌,監製舒文仲送個木結他俾佢,潤佢在溝女之餘都可以用佢來改編下歌放上網,而其實多年來唔點覺得有撐過佢的樂易玲,今日卻以大台代表身份簽約,拖住坤哥手仔忽然auntie上身,猛咁話佢有才華,仲要話佢係大台個藝員blog中,最有創意同最勤力藝人喎,佢仲睇過好多次坤哥惡搞版《衝上雲霄》添。
吳業坤「坤哥」呢幾年除了做下各女神的兵仔,好似Super Girls Aka,仲俾對方嫌窮唔騷,就係努力靠自己經營好已超過58,000人訂閱的「Kwan Gor」Youtube Channel,不時cover下歌晒唱功,甚至搞下gimmick反串唱下《衝上雲霄》。點都好過靠大台囉,未做過台慶隻棋咩!今日樂大媽講到好似好努力栽培佢咁,真係幾諷刺。
點都好啦,廿五歲有得出碟,都叫比上不足比下有餘,上台撐佢的陳國峰今年都三十二歲仲係出碟無望,依家索性去開拉麵店,人生有好多個五年等咩!
|